لحتى يعيش هالقلب

لما بتتفرج على صورك قبل سنين .. سنين مش بعيدة كتير
أصحابك .. اوقاتك .. ضحكاتك

بتتفرج على حالك وبتسأل قديش تغيرت!
وقديش راح اتغير!

قديش حبيت ناس وضحكت معهم من القلب, من دون اي تكلف او مكياج
من دون ما يهتموا لإسمك او شكلك او كلامك
من اي طبقة؟
او من اي بلد؟

حبيتوا بعض لضحكتكم .. لأوقاتكم لفرحكم
وقتها أرواحكم الي ضحكت .. مش حومرتكم او مسكارتكم

القلب الي جمعكم
ترى هالقلب ما بيعرف التكلف الي غرقانيين فيه

ما بيعرف قديش معك مصاري
وقديش بتاكل ووين ساكن
وشو لونك وكيف بتحكي
وكم طولك!

هو بيعرف بس قديش انت انسان..
وانو راح يعطيك حب كبييير ما إلو حدود بس لأنك "إنسان"

............................................

كلنا بنحس بهالكلام بس في مننا الي ما بيعرف يعبر
ومنا الي ما بيسترجي يعبر, لأنه ببساطة عايش بهالقشرة

قشرة شكلك أصلك بيتك حيّك لونك وزنك طولك !
ترى كمان معذورين .. هم بداخلهم حاسيين بقلبهم
بس خايفين ..

وبهيك احنا كونّا مجتمع خايف !! من ايش!

من قلبه!!

صرنا نخاف نقول اننا بنحب بعض .. اننا راح نوقف مع بعض
إننا ماراح ننسى بعض مهما الزمن أبعدنا

بنخاف من عيوننا في المراي
من كلامنا وقديش راح يفضحنا
من اهتمامنا

وهالخوف يوم عن يوم راح يكبر اكتر ..
راح نقتل بعض بإسم المحبة

بإسم السلام ... بإسم .. بإسم الخوف

الخوف الي جوانا راح يخلينا نكابر على حبنا لغيرنا
حتى لو احتاج الامر انو نغطي عيوننا عشان ما نشوف

راح نعمل المستحيل لحتى يموت هالقلب

راح نعمل المستحيل لحتى يعيش هالقلب.